Dijon, Archives départementales de la Côte d’Or, 15 H 257 (10)[1276]
Robert [II], duc de Bourgogne, notifie l’échange intervenu entre l’abbaye cistercienne de Fontenay et le Prieuré du Val le Duc dit le Quartier [a] .
A. Dijon, Archives départementales de Côte d’Or, 15 H 257, pièce 10.
B. Dijon, Archives départementales de Côte d’Or, 15 H 9*, fol. 141v-142r
Mention : E. Petit, Histoire des ducs de Bourgogne de la race capétienne, avec des documents inédits et des pièces justificatives, Paris, 1885-1906, t. VI, p. 248 [en ligne]
Nos .. Roubers[1], dux de Burgoigne, façons savoir a touz cels qui verrunt[2] et orrunt ces presentes letres[3] que en nostre presence pour ceu especialment estaubli freres Renauz diz ab-|2|-bés de Fonteney[4] de l’ordre de Cisteaux[5] et li convenz[6] de ce meimes leu hont recogneu pour devant nos qu’il[7] hont baillié, quittié et delivré an[8] non de loiaul et perfait eschange a |3| religious homes, a frere Martin, priour de la maison Nostre Dame dou Quartier, dite vulgaument Lou Val lou Duc, et au convent de ce meimes leu de l’ordre dou Vaul des |4| Chous, en eschange perpetuel tout lou pré qui part a ceaus doudit Quartier en la comme doudit Quartier des la bonne doudit pré qui est mise desus la fontaine, de bonne en bon-|5|-ne, jusque a la bonne desus Les Auges et des anqui de bonne en bonne pour[9] desus les Taignieres jusque[10] a la bonne[11] qui est mise delez la voie de la comme de Villemer, et de cele bonne de la |6| comme de Villemer, de bonne en bonne, por desus toute la voie jusque a la bonne qui est mise a la fin de Salive. Lesquex choses toutes desus dites lidiz abbés et li convenz de Fonteney[12] sunt[13] |7| tenu en bonne[14] foi de garantir a touz jours[15] mais contre toutes genz audit priour[16] et au convent de ladite maison dou Quartier. Pour louquel eschange desus dit an nostre presence pour |8| ceu especialment ansimant estaubli freres Martins priours et li convenz doudit Quartier hont recogneu pour devant nos qu’il[17] hont baillé, quittié[18] et delivré ausimant a touz |9| jours[19] mais au devant dit frere Renaut dit abbé de Fonteney[20] et au convent toutes ces choses ci desouz[21] escrites[22]. C’est asavoir une partie dou bois dou Quartier des la bonne qui est mi-|10|-se delez la voie des Fems[23] que l’en appele « la voie de Grancey » qui va por desus Lery, ansi[24] comme les bonnes anqui[25] mises devisent jusque a cele bonne[26] qui part antre[27] les bois a cels de Sein[28] |11| Ceigne et a cels de Quartier[29] et de cele bonne dou travers doudit bois jusque a la bonne qui part lou bois de Lery et les communes de Eschalo et des anqui au contramont de bonne[30] |12| an[31] bonne jusque au Fornot. Louquel eschange ausimant[32] lidiz priours et li convenz doudit Quartier hont promis an[33] bone foi de garantir audiz seignors de Fonteney[34], toujourz mais |13| contre toutes genz, en tel maniere que lidit[35] priours et li convenz doudit Quartier[36] auront[37] toutes aisances[38] de vaine pastures[39], de aigues, de perrieres et de voies des les chalonges de Escha-|14|-lo[40] en jus por devers loudit Quartier et cil de Fonteney[41] hont et hauront touz jourz mais pour lor[42] grange de Peuyseus[43] toutes manieres de aisances[44] de veine[45] pasture, de aigues, de voies |15| et de perrieres an[46] touz les bois de la maison doudit Quartier et i pourront anvoier[47] lidit de Fonteney[48] lor bestes an[49] toute la veine pasture tant comme il vouront[50] et quant il vouront[51] au |16| bois et[52] au pleins. Et cil dou Quartier[53] ne povent ne ne devient[54] anterrer ne torner l’aigue desoz ne desus la maison doudit Quartier en maniere[55] que cil de Peuyseus n’i puissent abovrer |17| lor bestes. Et ces eschanges desusdiz, nos[56] Roubers[57], desus diz dux de Bergoigne[58], voluns et les havons loez au parties tant comme a nos appartient, retenue a nos et a noz hers a touz |18| jorz mais qui saront duc de Bergoigne la garde an toutes les choses desdiz eschanges faiz a l’une partie et a l’autre. En tesmoignaige de laquel chose nos, a la priere et a la re-|19|-queste desdites parties avons mis nostre seaul en ces presentes letres avec lou seaul audit abbé de Fonteney et aveuc lou seaul audit priour doudit Quartier. Liquels abbés |20| de Fonteney et li convenz, liquels priours dou Quartier et li convenz, nos consentuns a toutes ces choses desus dites. Ce fu fait an l’an de grace mil deus cenz sep-|21|-tente et six, ou meis de aoust.
[a]Le Quartier, ou Notre-Dame du Quartier ou Val-le-Duc, est un prieuré de l’ordre du Val-des-Choux au diocèse de Langres (Côte d’Or, arr. Dijon, cant. Grancey-le-Château, comm. Salives), cf. L. Cottineau, Répertoire topo-bibliographique des abbayes et prieurés, Mâcon, 1939, t. II, col. 2386. L’ouvrage de J.-P. Roussel (Le prieuré du Val le Duc dit « le Quartier », 1248-1780, [Is-sur-Tille] : Société d’histoire Tille-Ignon, 2006) n’apporte rien à la connaissance de l’histoire médiévale et ignore cet échange.
[1] Roberz B. – [2] verront B. – [3] lettres B. – [4] Fontenoy B. – [5] Cisteaus B. – [6] couvenz B. – [7] que il B. – [8] en B. – [9] p barré B. – [10] nieres jusque a la écrit sur grattage A. – [11] bone B. – [12] Fontenoy B. – [13] sont B. – [14] bone B. – [15] jourz B. – [16] prior B. – [17] que il B. – [18] B (f. 142v). – [19] jourz B. – [20] Fontenoy B. –
[21] desoz B. – [22] escriptes B. – [23] Fins B. – [24] aussi B. – [25] enqui B. – [26] bone B. – [27] entre B. – [28] Saint B. – [29] Reprise sur de F[onteney] A. – [30] bo et tilde, A. – [31] en B. – [32] audimant B. – [33] en B. – [34] Font. A, Fontenoy B. – [35] lidiz B. – [36] Quarter B. – [37] hauront B. – [38] aisences B. – [39] Hésitation entre s rond et s long, A. – [40] Eschalou B. – [41] Fontenoy B. – [42] lour B. – [43] Pouyseus B. – [44] d’aisences B. – [45] vaine B. – [46] en B. – [47] envoier B. – [48] Font. A, Fontenoy B. – [49] en B. – [50] vourront B. – [51] vourront B. – [52] ou B. – [53] Quatier B. – [54] doivent B. – [55] meniere B. – [56] nous B. – [57] Roberz B. – [58] Bourgoigne B. Fin de B par mutilation.
